XOGOS POPULARES: O PELOURO

En 2º da ESO estamos traballando os xogos populares; coñecedes moitos dos que no voso libro de texto se citan, e estaredes buscando información sobre o xogo da billarda.

Eu quero recuperar un xogo que practiquei de pequena e que a algúns vos gustará coñecer: O PELOURO.

Cantos sobran?

Con coíños coma estes, máis grandes ou máis pequenos, pode xogarse ó pelouro.  Se queredes saber cantos pelouros sobran  e queredes aprender a xogar, premede na ligazón.

Xa vedes que o material que precisamos é moi barato. A ver cantos de vós o  conseguides para facer prácticas.

Lembrei agora que, hai xa uns anos, me regalaran un xogo con instrucións en inglés; mandei traducilas porque me dixeran que o xogo se parecía ó Pelouro ou ás Tabas. Parécese?

Os materiais, neste caso, non podemos atopalos á beira do río ou polos camiños. Vede os Jacks metálicos e as pelotiñas para xogar :

Con estas instrucións poderiamos xogar:

JACKS  (TABAS ? )

INSTRUCIÓNS.

Xogo coñecido como Jack Stones, Check Stones, Knuckle Bones e Dibs, teñen existido moitas versións deste antigo xogo, con variantes nas  regras. As instrucións dos seguintes parágrafos son unha mostra das regras básicas do xogo e pode facerse máis interesante creando regras propias.

Comeza co xogo de Tabas na palma da túa man. Lanza suavemente as tabas sobre unha mesa e atrapa todas as que poidas no anverso da túa man. Pon as tabas atrapadas, a un lado.O resto das tabas deberían estar entón esparexidas na mesa e deben ser recuperadas mentres se bota a pelotiña. Sostén a pelotiña na túa man a pouca altura sobre a mesa. Sóltaa; recolle unha taba coa mesma man e atrapa de novo a pelotiña antes de que rebote por segunda vez. Repite o mesmo ata que atrapes todas as tabas ou ata que non consigas atrapar a pelotiña a tempo.

Engade as tabas recuperadas ás que atraparas no anverso da túa man, e anota o total. Se conseguiches recoller todas as tabas na primeira quenda, repite o xogo, pero desta volta debes atrapar dúas tabas antes de atrapar a pelotiña. Se volves ter éxito, xoga de novo e recolle tres tabas e así sucesivamente ata que non atrapes a pelotiña a tempo. No momento en que non recollas o número requerido de tabas ou non atrapes a pelotiña antes do segundo rebote, comeza a quenda do seguinte xogador.

O gañador é o xogador que consegue atrapar e recoller o maior número de tabas ó final da competición.