MOROGOS CAÍDOS

Cando en 1º de BAC traballamos a influencia das linguas de substrato no léxico galego, díxenlles ós meus alumnos que mirasen o érbedo do xardín do Instituto, e os seus froitos: morotes, morogos ou amorodos, porque algo teñen que ver co tema. Non sei se o fixeron.

A min hoxe chamoume a atención ver moitos morogos, así lles chamei eu sempre, tirados no chan, debaixo do érbedo.Vede as fotos:

Como non os comerán os paxariños que visitan o xardín? Terán medo a emborracharse? Seica teñen alcol. Había xente que llos botaba ó viño para que tivese máis graduación; iso me contaban.

Nun dos poemas de Eduardo Pondal aparece o érbedo:

[ESQUIVA RAPACETA]

Esquiva rapaceta,

coma do toxo a fror,

tan pura coma as frescas

augas de Riobóo;

(río de Bergantiños,

xentil e soador,

cando da Baiabosa

sae con rouco son,

antre miúdos seixos

de branca e leda cor,

buscando o brando seo

do seu maior o Anllóns)

¿de onde tirache, nena,

tan dura condición?

Non negues, non, meniña,

o que, pra darse, dou;

cata ben que ofendido

non te castigue Amor:

o trigo é para o fouce aguzada,

o érbedo verde ten súa zazón.

Chégase o doce figo

polo seu tempo bóo,

baixo a materna folla 

de prácido verdor,

e daquel que ten fame

en fuxir non pensóu,

e ben furtarse deixa

do natural ladrón:

a mazán no seu árbre

soña cun furtador:

non fuxas, rapaceta, 

tenros abrazos, non;

non negues de natura

o que, pra darse, dou;

non evites esquiva

as doces leis de amor:

o trigo é para o fouce aguzada,

o érbedo verde ten súa zazón.

Non foxe a vaga poldra,

que da ponte Arantón

pace na esquiva gandra

o novo toxo mol, 

cando de lonxe sente

a penetrante voz

(que lle chega hastra os ósos)

do seu doce amador;

e espera a quen a busca,

pero non foxe, non;

nin nega o que natura, 

pra non negarse, dou,

mais ó xugo se rende

do caro vencedor;

negar é crueza,

ceder é razón:

o trigo é para o fouce aguzada,

o érbedo verde ten súa zazón.

Queixumes dos Pinos e outros poemas. Eduardo Pondal. Edicións Castrelos. 1975.

No texto que aparece na Biblioteca Virtual Galega figura: o trigo he para a fouce aguzada. Fixádevos na concordancia e no verbo.

Se queredes saber máis sobre o érbedo, a súa relación con Xerión e outras cousas de interese, entrade en Groucho.