O DÍA MUNDIAL DA POESÍA . POEMAS DE ALUMNOS DE 1º ESO

 Imaxe de Vigocultura.org

Hai varias entradas neste blog nas que se poden ler poemas de Tovar, de Víctor Campio, de Curros, de Rivas, de  Castelao, de Pimentel, de Cabanillas, de Celso Emilio… Hai tamén un mapa de poetas e un calaméo e uns vídeos con moita poesía acompañada de moita natureza, pero agora que se vai celebrar o Día mundial da Poesía, quero que os protagonistas sexades os alumnos de 1º ESO.

Vede os vosos traballiños. O libro de texto pedíavos que escribísedes un breve poema que tivese por tema a conservación da natureza ou que tratase da loita da xente do terceiro mundo para mellorar as súas condicións de vida. Estes foron algúns dos resultados:

Ouro…para os ricos.

Dereitos…para os ricos.

Alimento…para os ricos.

Auga…para os ricos.

Morte…para os pobres.

Deberes…para os pobres.

Desnutrición…para os pobres.

Deshidratación…para os pobres.

Agora, eu digo

Agora, eu penso

Agora, eu razoo

Agora pregúntome, por que?

Porque eles son peores?

Porque eles son raros?

Porque eles non os teñen?

Porque eles teñen que morrer?

Entón, eu anuncio

liberádevos, pobo.

Que se escoite un berro

alá no horizonte

que faga estremecer as pedras.

Que anuncie existencia,

que nada se vos opoña,

en vós reside o espírito,

agora, loitade, andade ergueitos.

Poema de Daniel Alonso Lorenzo 1º ESO A

Un rapaz do terceiro mundo que corre

vai por auga e vai ao cole

estuda e traballa e case non come

para cansado e  morre.

Un rapaz coma nós corre

vai por fanta e marcha ao cole

estuda e non traballa e sóbralle o que come

non está canso pero marcha e dorme.

Agora pensa e compara

no que ti tes

e o que a nai do rapaz sofre.

Poema de Xosé Bieito Molina 1º ESO C

O TERCEIRO MUNDO

As persoas do terceiro mundo

loitan por sobrevivir

porque eles queren rir,

beber, comer e sorrir.

Loitan por beber,

xa que co que sofren

moita sede han de ter.

 Loitan por comer,

porque non teñen nada.

Viríalles ben unha fada

para evitar desgrazas

como morrer a pedradas.

Teñen dereito a durmir

nunha casa decente,

amoblada, para poder rir,

e pacientemente vivir.

Defendamos e axudemos

aos indefensos necesitados,

non sexamos desalmados

nin tan apampados.

Miremos, miremos a ambos lados,

pero, sempre, sempre os encontramos.

 A NATUREZA

Se houbese máis natureza

estaría moito mellor,

xa que a natureza empeza

cando non hai calor.

Non hai que esquecer

que a natureza é importante

aínda que algúns

crean que só en parte.

Eu pido e nós pedimos

que a natureza non se perda,

aínda que moito resumimos

para que se entenda.

Todos debemos de colaborar

xa que a natureza haina que coidar,

temos que darlle de alimentar

e sempre a temos que regar,

moito cariño lle hemos de dar

porque a natureza nunca nos deixará de amar.

Poemas de Aarón González 1ºESO C

TERCEIRO MUNDO

Terras sen auga

guerras sen fin

fame no Corpo,

é o que nos din.

E o que nos din é certo,

aínda non querendo ver,

que  se nós imos mal,

aínda podemos comer.

Queixámonos de todo,

ata de traballar.

pero hai moitos nenos

sen poder estudar.

CONSERVACIÓN DA NATUREZA

Ceos limpos de malos fumes

e augas de gran beleza,

serán a única solución

para a nosa natureza.

Os nosos grandes bosques

debemos de protexer

para que os seus animais

poidan correr e correr.

Vivimos da nosa terra,

e se non a tratamos ben,

será co paso dos anos

que nos abandone tamén.

  Uxía López Mangana. 1º ESO C

A sección de literatura do Liceo de Ourense dedicará a xornada a Celso Emilio Ferreiro. A lectura dos poemas estará a cargo de alumnas e alumnos dos Institutos Otero Pedrayo, Celanova, A Carballeira, Carmelitas e Blanco Amor; compañeiros vosos de 1º e 2º BAC xa os están preparando. Asistide ó acto, comeza ás 17,00.